2Th 1 | MHL | STEP | Aria i yiam arow, Pol, Sailas ne Timoti, i naap parosifa fain ni Tesalonaika nia siisimomimik, ni eena yiena Auwa Mua Maneka ne yiena Maneka Yeesus Krais teeria-pa wiar ikeman nain.

2 Thessalonians 1

1 Aria i yiam arow, Pol, Sailas ne Timoti, i naap parosifa fain ni Tesalonaika nia siisimomimik, ni eena yiena Auwa Mua Maneka ne yiena Maneka Yeesus Krais teeria-pa wiar ikeman nain. 2 I feenap nia maimik, yiena Auwa Mua Maneka yiena Maneka Yeesus Krais ikos nia kemalep nia asipiwkin ni kema sonom eliwa ikowen.

Mua Maneka faremi sira eliwa naakowa

3 Aria emar unowik, ni kekanep Yeesus Krais opora opap baliwep ookiman nain naap onami opora opa-afuriman. Ne ni unowiya niam kookalep niam saliwami baliwep akena niam wuiman. Naapeya i ni muuta nain anane Mua Maneka faremi sira eliwa naakem-ikowa-ke. Nain pepek. 4 Ni nia samo-samorami sirirowa niiwkin samor akena aawem-ikaiman, nain ni kekanep opora naap opam-ikaiman. Naapeya i Yeesus Krais teeria kame unowa wiar ikiwimik nain kemelap ni nia maemi unuma nia pirimik.

5 Ni Mua Maneka pika kemena-pa ikeman muuta nain sirirowa aawiman. Nain onoma feenap, Mua Maneka-ke nia mainok, “Aa, ni pepek.” Naapeya naneka, Mua Maneka i baliwep yia pupep eena yia maiya nain makena-ke. 6 Moram o sira kaken akena ookiya, wi eena sirirowa niimik nain os-ke ikoka kiripami sirirowa wiinon. 7 Ne ni sirirowa aawiman nain nia saliwami kema sonom eliwa niinon. Ne is pun sira naap yia oninon. Nain ikoka yiena Maneka Yeesus owow iinan-pa ona ensel kekanowa wiamiya oromi naap yia oninon. 8 O mukun wilinowa onaiya oromi wi mua Mua Maneka makena-ke me naep yiena Maneka Yeesus opor eliwa me wiar ookimik nain sirirowa maneka wiinon. 9 Wi mua nain yiena Maneka epasia-pa wia wueya o kekanowa maneka ne parin onaiya ikua neeke me wiar ikaikuan. Wi nain anane maneka sirirowa naap aawem-ikaikuan, weeserowa marew. 10 Fofa eena Yeesus ekapiya neeke ona teeria o opora wiar opap ikemik nain-ke unuma wiar pirami kemelikuan. Neemi o kakaikuan. Ne ni i opora nia maakemik nain opaman, naapeya iir nain nis pun wi nain wiamiya ikok kemelowen.

11 Naapeya i nain kema suuwap ni feenap ikeka naep Mua Maneka farem-ikaimik. Os-ke nia fareya ona teeria-pa wiar ikeman nain ni kakeniw ikaiwkin nia mainok, “Aa, ni pepek.” Neemi sira ele-eliwa onowa kemaiw ikeman nain ona nia kekanowam-ikaeya ni naap onam-ikowen. Ne ni Yeesus opor makena wiar opap uuwiman nain pun nia asipami baliwep nia silewominon. 12 Ni naap onam-ikaiwkin yiena Maneka Yeesus Krais unum maneka aawinon. Ne nis pun o wameiya ikok o muuta nain unum maneka aawowen. Nain Mua Maneka ne yiena Maneka Yeesus Krais ikos nia kemalep naap nia asipiwkin ni naap ikowen. I maa unowa nain naep Mua Maneka farimik.